Europa ka tre muaj afat për të shpëtuar euron, sipas miliarderit amerikan George Soros.
“Për mendimin tim, autoritetet kanë një dritare tremujore gjatë të cilëve do të mundnin ende të korigjonin gabimet e tyre dhe të ndryshojnë tendencat e deritanishme. Duke thënë autoritetet kam parasysh kryesisht qeverinë gjermane dhe Bundesbank-un, pasi në një krizë fuqinë e kanë kreditorët dhe asgjë nuk mund të bëhet pa mbështetjen e Gjermanisë”, theksoi George Soros në një ligjëratë që publikohet në uebsajtin e tij.
“Pres që opinioni publik grek do të frikësohet mjaft nga perspektiva e përzënies nga bashkimi Europian, dhe t’i japë një shumicë të vogël një koalicioni (qeveritar) që është i gatshëm të zbatojë marrëveshjen e sotme” me BE, BQE dhe FMN, shtoi Soros.
Mirëpo, “asnjë qeveri nuk mund të plotësojë kushtet e marrëveshjes dhe kriza greke ka gjasë të arrijë kulmin në vjeshtë. Deri atëherë edhe ekonomia gjermane do të jetë dobësuar dhe do të jetë akoma më e vështirë për kancelaren gjermane të bindë opinionin e vet publik që të marrë më shumë përgjegjësi europiane. Kjo krijon dritaren e tre muajve”, shpjegoi Soros.
AMNA/-
